ဇူလိုင် ၃၀ ၊ ၂၀၂၅
GG (VOM)
မန္တလေးတိုင်း ၊စဉ့်ကူးမြို့နယ်ထဲက လက်ပန်လှရဲစခန်း နဲ့ ရွှေပန်းတောရွာ၊ ဇရပ်ကွင်းရွာတို့မှာ လေကြောင်းတိုက်ခိုက်ခံရပြီး လူ ၂၀ ကျော်သေဆုံးပြီး ထိခိုက်ဒဏ်ရာရသူ တွေရှိခဲ့တယ်လို့ သိရပါတယ်။
ဇူလိုင် ၂၉ ရက်နေ့ ၊ ညနေ ၅ နာရီ ၄၀ မိနစ်ကျော်လောက်မှာ လေကြောင်းတိုက်ခိုက်ခံရတာဖြစ်ပြီး လက်ပန်လှရဲစခန်းရှိ အချုပ်စခန်းပေါ်ကို ဗုံးကျရောက်ပေါက်ကွဲခဲ့ကာ အချုပ်သားနဲ့ အချုပ်ခန်းစောင့်သူတွေအပြင် လမ်းသွားလမ်းလာသူအချို့ သေဆုံးခဲ့တာဖြစ်တယ်လို့ စစ်ရေးသတင်းရင်းမြစ်ကပြောပါတယ်။
” လက်ပန်လှရဲစခန်းမှာ ချုပ်ထားတဲ့ အချုပ်သားနဲ့ အစောင့်တွေ ၂၀ လောက်သေတယ်။ လမ်းသွားလမ်းလာ နှစ်ယောက်ထိတယ် သေတဲ့ထဲ အသိတွေကိုက ခြောက် ယောက်လောက်ပါသွားတယ်။ ” လို့ စစ်ရေးသတင်းရင်းမြစ်ကပြောပါတယ်။
အလားတူ မနေ့ကညနေပိုင်းမှာပဲ စဥ့်ကူးမြို့နယ်ထဲက ရွှေပန်းတောရွာမှာလည်း လေကြောင်းဗုံးကြဲခံရပြီး သေဆုံးသူအချို့ရှိခဲ့ကြောင်းနဲ့ ဇရပ်ကွင်းဘက်မှာတော့ ထိခိုက်သူမရှိဘူးလို့သိရပါတယ်။
” လက်ပန်လှအနောက်ဘက် ရွှေပန်းတောလည်း တလုံးချတာ နှစ်ယောက်သေတယ်။ လတ်တလောတော့ ရှောင်တိမ်းနေရတာပေါ့” လက်ပန်လှရွာခံကပြောပါတယ်။
အလားတူ နောက်ထပ် ဒေသခံတယောက်ကလည်း ” လက်ပန်လှ အချုပ်စခန်းပေါ်တည့်တည့်ကျတော့ အချုပ်ထဲရှိသူတွေတော်တော်ထိကြတယ်။။ ရွှေပန်းတောဘက်မှာကတော့ လင်မယားနှစ်ယောက်ထိတယ်ကြားတယ်။ လက်ပန်လှက မကြာခဏဆိုသလိုဗုံးကြဲခံရတယ်။”လို့ ပြောပါတယ်။
လေကြောင်းတိုက်ခိုက်ခံရတဲ့ စဥ့်ကူးမြို့နယ်ကတော့ PDF တွေကစိုးမိုးထိန်းချုပ်ထားတာတဲ့ ဒေသ ဖြစ်ပါတယ်။
မနေ့က ဇူလိုင် ၂၉ ရက်နေ့ မနက်ပိုင်းမှာလည်း မန္တလေးတိုင်းထဲကမိုးကုတ်အရှေ့ပိုင်းကို လေကြောင်းတိုက်ခိုက်ခံရပြီး လေးယောက်သေဆုံးကာ ထိခိုက်ဒဏ်ရာရ သူတွေရှိခဲ့တယ်လို့သိရပါတယ်။
ဓာတ်ပုံ – CJ
